News

Oathtaking ceremony sa mga Newly Registered Social Workers gipahigayon

Details

Published: Thursday, 28 November 2024 14:48

Written by DavNor PICKMO (Maria Lorna P. Tripoli)

Views: 0

Gipahigayon ang oathtaking ceremony sa mga bag-ong registered social workers sa DavNor Gym, Nobyembre 26, 2024. Usa kini ka espesyal nga okasyon nga gipasiugdahan sa Philippine Association of Social Workers, Inc. (PASWI) – Davao del Norte Chapter ug Professional Regulation Commission Board of Social Workers uban sa pakigtambayayong sa Probinsyal nga Panggamhanan sa Davao del Norte.

Gisentro ang seremonya sa pagpasidungog sa mga bag-ong social workers, diin highlight sa okasyon ang pinning ceremony ug paghatag sa mga sertipiko. Usa sa mga gipasidunggan mao ang Davao del Norte State College (DNSC), nga giila isip Top Performing School sa 2024 Social Worker Licensure Exam. Ang tanan nilang examinees nakapasar, nga naghimo og 100% passing rate.

Sulti sa representante ni Governor Edwin I. Jubahib nga si Arnel Montero nga nalipay ang gobernador nga madugangan ang mga social workers sa probinsya nga motabang kaniya sa pagtunol sa serbisyo alang sa mga katawhan.

"As the Governor of Davao del Norte malipayon ko nga madungagan na usab ang atoang mga bag-ong social workers, ang inyong papel nga mamahimong mga frontline service providers sa social welfare ug social protection, maoy yawi sa pagtabang sa atong mga kaigsuonan nga nanginahanglan sa suporta ug serbisyo," pagbasa ni Montero sa mensahe ni Gobernador Jubahib.

Gipakita usab ang garbo sa DNSC pinaagi sa usa sa ilang graduate, nga nalakip sa Top 10 sa maong board exam nga si Jerusha Abehail Corcilles diin nakaangkon niya ang ika-7 nga puwesto. Gihatagan og espesyal nga pasidungog ang maong graduate tungod sa iyang kalampusan ug dedikasyon. Sa pakighinabi kang Corcilles sa PTV News Team gisulti niya nga ang paglambigit sa kalihokan sa komunidad maoy nakapatukmod kaniya nga mamahimo gayud nga registered social worker.

"Kadto gyud nga mga clients nako before nga during my p+ractical gyud nga practice sa social work, makita nimo ang impact nga pwede nimo mabuhat sa mga katawhan. Kadtong unsay mahimo natong changes sa ilaha po, mao gyud to nakapa-motivate nako nga magpadayon," matud ni Corcilles.

Samtang, ang sertipiko alang sa DNSC isip Top Performing School gihatag mismo sa PASWI DavNor Chapter, nga nagpadayag sa ilang suporta sa pagpalambo sa kalidad sa edukasyon ug social work sa rehiyon.

Puno sa pagdasig ug inspirasyon ang maong kalihokan nga gisaksihan nila Provincial Social Worker and Development Head Rosalinda Rapista, kauban ang mga kawani sa PSWDO, Dr. Fe Sinsona gikan sa PRC, faculty members sa DNSC sa pagpanguna ni Joy Sorrosa, ang Presidente sa Davao del Norte State College, Melchor Tolentino, ang PASWI Chapter President, ginikanan sa mga honorees, ug uban pang bisita.

Ang nasangpit nga mga ahensya sa panggamhanan naghatag og importansya sa papel sa mga social workers sa pagserbisyo sa katilingban. Ang mga bag-ong registered social workers gihagit nga ipadayon ang ilang dedikasyon ug pagsalig sa ilang propesyon alang sa kaayohan sa komunidad.