Subay sa pagsaulog sa National TechVoc Day 2024, gidagsa sa mga aspiring jobseekers ang usa ka Job Fair cum ‘World Cafe of Opportunities’ nga gipahigayon sa Technical Education and Skills Development Authority (TESDA) - Davao del Norte niadtong Agosto 2 sa Robinsons Mall, Tagum City.
Sa pakigtambayayong sa mga National Government Agencies ug pribadong mga institusyon, tumong sa maong aktibidad ang makatanyag og nagkadaiyang oportunidad ug training support alang sa mga jobseekers sa probinsya. Matud ni TESDA Davao Del Norte Provincial Director Jasmin Neri, naghulat sa ila ang 1,197 ka mga job vacancies gikan sa lain-laing mga institusyon.
“So, ang star gyud nato karon is ang atoang jobseekers. Atoa ning gipahigayon para ang atoang mga taga-Davao del Norte constituents mahatagan nato og mga trabaho. Adunay naghulat sa ila nga 1,197 ka mga job vacancies nga kung palaron sila, mo-qualify sila sa maong mga requirements, then mahatag nato na sa ila nang 1,197 ka mga job vacancies,” sulti ni PD Neri.
Gawas sa job fair, gipahinabo usab sa maong katikaran ang skills training para sa katawhan, diin lain-laing training providers ang nitambong aron madugangan ang ilang kaalam. Oportunidad na usab kini para sa mga indibidwal nga gusto mokuha og national certificate human sa ilang training.
Dako ang kalipay ni Joy Matero, usa ka fresh graduate gikan sa Asuncion, sanglit usa siya sa mga gi-hire on the spot sa usa ka pribado nga kompanya. Usa lamang si Joy sa mga gatosan ka jobseeker nga nakakuha og trabaho sa maong adlawa.
“Happy ko, pero at the same time kulba kaayo kay ako’y pinakauna ‘nya na-shock ko kay kaganina gipatawag ko ‘nya gi-hire on the spot na diay ko… Para sa akoa nindot kaayo ni nga opportunity and advantage pud kay duol ra. Di na maglibog ang mga aplikante kung asa moadto, and kabalo na sila asa ilang applyan,” matud ni Matero.
Gani, dako ang pasalamat ni PD Neri sa makanunayong suporta ni Governor Edwin “Kuya Gov” Jubahib sa mga programa sa TESDA, apil na dinhi ang pagpalig-on sa kaalam ug kahanas sa mga Dabaonon.
“Through hiring our individuals or jobseekers, atoang na-transform ang ilahang mga lives. Pinaagi ana ilang national certificates, hopefully a new journey to our constituents nga mahatagan sila’g opportunity sa ilang livelihood training through entrepreneurship and ma-hire both sa local, national, and international nato na mga employers… Magpasalamat kami sa atong Provincial Governor Hon. Edwin Jubahib for the full support sa atong mga programa labi na karon sa atoang National TechVoc Day,” ingon ni Neri.
Ginasaulog ang National TechVoc Day matag bulan sa Agosto subay sa RA 10970, diin usa ang job fair sa mga estratehiya aron matabangan ang mga jobseekers nga makabaton og trabaho nga tukma sa ilang kahanas. Usa usab kini ka oportunidad aron makaapil sila sa mga ginatanyag nga technical vocational training courses sa TESDA.
Writer: Hannah Zafra
