Bawal mosulod sa gobyerno kung nagagamit og ilegal nga droga. Kung duna may nakasulod gumikan sa nagpaluyo niini o impluwensya, kini dili magdugay sa serbisyo. Duha ang kapaingnan, rehabilitasyon, alang sa mga casual ug regular, o i-terminate, kung JO, contractual, ug honorarium. Kini ang hugtanong pahimangno ni Provincial Human Resource Management Office (PHRMO) Head Edwin Palero atubangan sa mga bag-ong nadawat nga mga trabahante sa kapitolyo.
Sulti ni Palero aduna nay 19 ka mga trabahante nga positibo nga nagagamit sa ilegal nga droga. Resulta kini sa hugot nga pagpatuman ni Governor Edwin "Kuya Gov" Jubahib nga mamahimong "drug free and safe work place" ang Provincial Capitol pinaagi sa random drug testing sa mga empleyado gikan sa nagkadaiyang departamento.
Gibatbat ni PHRMO Head Palero ang kamahinungdanon sa himsog nga panglawas ug maayong panghunahuna sa matag empleyado nga moserbisyo sa kapitolyo. Dugang butyag niya nga ang surpresang drug test sa mga trabahante nagpadayon hangtod karon sa daan ug mga bag-ong mamumuo.
"Pero kung Job Order? Sorry gyud, terminate gyud ha. Mao nang naay balak sa inyo, naay abnormal nga nakasulod diri pagnormal namo. Undang namo anang droga," sumala ni Palero.
Sa pikas bahin pagtinabangay ug pagkugi ang mensaheng gipadangat ni Governor Jubahib ngadto sa mga kawani sa gobyerno pinaagi sa iyang representante nga si Emilio Baguio, usa sa mga executive assistant ni Gov Jubahib. Ang kakugi sa pagserbisyo ug matinud-anong pagpangalagad ni Gov Jubahib maoy gihatagan og kabug-aton sa iyang tigpamaba agi’g panag-ingnan sa tanan.
"According to Kuya Gov ang pagpangalagad ug pagserbisyo sa katawhan usa ka dakong prebilihiyo o responsibilidad. Busa kita nanagkatigom alang sa paghisgot sa mga programa, mga balaudnon, ug regulasyon ug uban pang importanteng impormasyon may kalabotan sa atong pagpanarbaho dinhi sa kapitolyo," ingon ni Baguio.
Samtang anaa sa 90 ka mga partisipante nga nitambong sa usa ka adlaw nga "Orientation on HR matters for the newly-hired employees" sa provincial capitol, Marso 21, 2024 nga gipahinabo sa Basilio's by Jbites Events Place, Brgy. San Miguel, Tagum City.
Writer/Photos: Maria Lorna P. Tripoli
