Gibatbat ni Governor Edwin "Kuya Gov" Jubahib ang kamahinungdanon sa pagmintinar sa kahapsay ug kalinaw sa usa ka lungsod alang sa pagdani og mga kapitalista, atol sa culmination program sa ika-33 nga anibersaryo sa LGU Talaingod, Hulyo 29, 2024.
Gihatagan og gibug-aton sa gobernador ang pagka-insurgency free sa probinsya. Naghisgot usab siya sa mga proyekto sa kadalanan sa mga suok nga sitio nga nagpadayon karon sama sa mga mosunod:
Road Opening:
Sitio Bato to Sitio Piroy
Sitio Lindangan to Camingawan
Bonsalag to Malapanit
Concreting:
Junction Angelo to Lumabag
Sitio Cuyas to Bonsalag
Crossing Uraya to Kilamayon
Road Rehabilitation:
Sitio Milako to Sitio Lambid
Central Baogan to Sitio Miliong
"Wala ta moundang paghimo’g mga project, mga proyekto para paingon sa mga far-flung barangays. Wala ta’y undang sa pagtan-aw sa mga sitio nga walay mga kalsada para mahimoa’g kalsada,” matud ni Jubahib.
Gipasalamatan usab ni Gov Jubahib ang mga Indigenous People nga nagbantay ug niunong kaniya sulod sa tulo ka bulan nga preventive suspension. Ang suporta sa mga IPs nagpalig-on sa iyang tinguha nga mapalambo ang Talaingod pinaagi sa mga programang pang-agrkultura sama produktong abaca, pagpananom og durian, lubi ug kawayan nga i-market sa gawas sa nasud.
"Tungod sa peace and order situation nga maayo na, makasalig na ang mga investor. Makita ninyo ang going to Uraya, daghan na kaayo'g mga investor nga mikapital para nga mobutang og negosyo sa atong lungsod sa Talaingod. Mga kaigsuonan ko, mao nga giingon nako sa inyoha nga importante ang kahapsay ug kalinaw nga sitwasyon sa usa ka lungsod. Daghan ang mga kapitalista nga mohatag og pagsalig nga mobuhos sa ilang kapital ug mao na mosugod sa development," sulti sa gobernador.
Samtang, si Mayor Jonnie Libayao mapasalamaton sa suporta sa gobernador.
"Manghinaot ko nga ang imong pagmahal ug suporta dinhi sa lungsod sa Talaingod magapadayon," ingon ni Libayao.
Gipabibo ang okasyon pinaagi sa field demo sa mga kabataan gikan sa tulo ka baryo sa Palma Gil, Sto. Niño, ug Dagohoy, ug naglakip sa mga papremyo alang sa mga food fest, agri fair ug uban pa. Nipatim-aw sab ang mascot sa Team Go ni Senator Christopher Lawrence "Bong" Go nga nisabwag sa mga t-shirts ug bola sa basketball ngadto sa mga katawhan.
Writer: Lorna Tripoli
