Naghinam-hinam ang mga atleta nga tinun-an sa Alternative Learning System (ALS) human gipahitabo ang ALSLYMPICS Davao del Norte 2023, sa Davao del Norte Sports and Tourism Complex (DNSTC), Mankilam, Tagum City, niadtong Mayo 6, 2023.
Gisalmotan kini sa upat ka mga Schools Division sa probinsya sama sa Davao del Norte Dvision, Tagum City Division, Panabo City Division ug Island Garden City of Samal Division.
Daghang sports event ang gihanyag sa maong padula sama sa basketball, volleyball, badminton, boxing, table tennis, swimming ug daghan pang uban. Kalakip sab ang pag-indigay sa nagkaidayang talento sama sa zumba competition, vocal duet contest, spoken word poetry contest, ug Ginoo at Binibining ALSLYMPICS 2023.
Sumala ni Provincial Sports, Youth and Development Officer Giovanni Gulanes nga ang ALSLYMPICS sa probinsya ang nag-inusarang padula nga gimugna alang sa mga tinun-an sa ALS sa tibuok Pilipinas. Gumikan kini sa dakong pangandoy ni Governor Edwin “Kuya Gov” Jubahib nga mahatagan ang tanang mga kabatan-onan og oportonidad nga makadula sa tanang matang sa isports bisan pa man anaa kini sa dili pormal nga edukasyon. Dugang ni Gulanes nga dako ang natabang sa maong padula nga nahibalik sa mga kabatan-onan ang interes sa pag-eskwela.
Sa mensahe ni Board Member Nicandro Suaybaguio Jr., iyang paningkamotan ang paghimo’g ordinansa alang sa pag-institutionalize sa ALSLYMPICS sa Davao del Norte, sa ingon nga paagi padayon kining maimplementar og mapahimuslan sa mga magtutungha sa ALS.
Nipaambit sab kini sa iyang mga bulawanong pulong ngadto sa mga atleta, nga bisan pa man sa kalisdanan nga ilang nasinatian, padayon nga makigbisog aron makab-ot ang mga pangandoy nga makahuman sa pag-eskwela nga magamit sa pagpalambo sa ilang pamilya.
“𝘛𝘢𝘣𝘢𝘯𝘨𝘪 𝘬𝘰 𝘢𝘯𝘪 𝘚𝘪𝘳 𝘎𝘪𝘰𝘷 𝘯𝘨𝘢 𝘮𝘢𝘨𝘱𝘢𝘴𝘢 𝘵𝘢 𝘰𝘨 𝘰𝘳𝘥𝘪𝘯𝘢𝘯𝘴𝘢 𝘯𝘨𝘢 𝘪-𝘪𝘯𝘴𝘵𝘪𝘵𝘶𝘵𝘪𝘰𝘯𝘢𝘭𝘪𝘻𝘦 𝘯𝘢𝘵𝘰 𝘴𝘢 𝘢𝘵𝘰𝘢𝘯𝘨 𝘱𝘳𝘰𝘣𝘪𝘯𝘴𝘺𝘢. 𝘈𝘯𝘨 𝘪𝘯𝘨𝘰𝘯 𝘯𝘢𝘬𝘰 𝘴𝘢 𝘪𝘯𝘺𝘰𝘩𝘢, 𝘥𝘪𝘭𝘪 𝘪𝘯𝘨𝘰𝘯 𝘯𝘨𝘢 𝘱𝘢𝘶𝘯𝘩𝘢𝘯𝘢𝘺 𝘬𝘶𝘯𝘨 𝘥𝘪𝘭𝘪 𝘢𝘯𝘨 𝘤𝘩𝘢𝘭𝘭𝘦𝘯𝘨𝘦, 𝘢𝘯𝘨 𝘩𝘢𝘨𝘪𝘵 𝘴𝘢 𝘬𝘪𝘯𝘢𝘣𝘶𝘩𝘪 𝘯𝘨𝘢 𝘢𝘵𝘰𝘢𝘯𝘨 𝘮𝘢𝘬𝘰𝘮𝘱𝘭𝘦𝘵𝘰 𝘢𝘯𝘨 𝘢𝘵𝘰𝘢𝘯𝘨 𝘮𝘨𝘢 𝘱𝘢𝘯𝘨𝘢𝘯𝘥𝘰𝘺. 𝘕𝘢𝘴𝘢𝘺𝘰𝘥 𝘬𝘰 𝘯𝘨𝘢 𝘥𝘢𝘨𝘩𝘢𝘯 𝘥𝘪𝘯𝘩𝘪 𝘴𝘢 𝘪𝘯𝘺𝘰𝘩𝘢 𝘱𝘢𝘮𝘪𝘭𝘺𝘢𝘥𝘰 𝘯𝘢. 𝘚𝘪𝘨𝘶𝘳𝘰 𝘶𝘴𝘢 𝘯𝘪 𝘬𝘢 𝘤𝘩𝘢𝘭𝘭𝘦𝘯𝘨𝘦 𝘯𝘨𝘢 𝘪𝘱𝘢𝘬𝘪𝘵𝘢 𝘴𝘢 𝘪𝘯𝘺𝘰𝘩𝘢𝘯𝘨 𝘮𝘨𝘢 𝘢𝘯𝘢𝘬, 𝘯𝘨𝘢 𝘴𝘪 𝘮𝘢𝘮𝘢 𝘰 𝘴𝘪 𝘱𝘢𝘱𝘢 𝘯𝘢𝘯𝘪𝘯𝘨𝘬𝘢𝘮𝘰𝘵 𝘯𝘨𝘢 𝘮𝘢𝘬𝘢𝘩𝘶𝘮𝘢𝘯 𝘴𝘢 𝘱𝘢𝘨-𝘦𝘴𝘬𝘸𝘦𝘭𝘢 𝘬𝘢𝘺 𝘩𝘢𝘨𝘪𝘵 𝘯𝘪 𝘴𝘢 𝘪𝘯𝘺𝘰𝘩𝘢𝘯𝘨 𝘢𝘯𝘢𝘬 𝘯𝘨𝘢 𝘬𝘶𝘯𝘨 𝘮𝘢𝘬𝘪𝘵𝘢 𝘯𝘪𝘭𝘢 𝘯𝘨𝘢 𝘮𝘢𝘬𝘢𝘢𝘯𝘨𝘬𝘰𝘯 𝘮𝘰’𝘨 𝘥𝘪𝘱𝘭𝘰𝘮𝘢, 𝘸𝘢𝘭𝘢𝘺 𝘳𝘢𝘴𝘰𝘯 𝘯𝘨𝘢 𝘢𝘯𝘨 𝘪𝘯𝘺𝘰𝘩𝘢𝘯𝘨 𝘢𝘯𝘢𝘬 𝘮𝘰𝘴𝘶𝘯𝘥𝘰𝘨 𝘱𝘶𝘥 𝘴𝘢 𝘪𝘯𝘺𝘰𝘩𝘢 𝘯𝘨𝘢 𝘮𝘢𝘯𝘪𝘯𝘨𝘬𝘢𝘮𝘰𝘵 𝘱𝘢𝘳𝘢 𝘮𝘢𝘩𝘶𝘮𝘢𝘯 𝘰𝘨 𝘱𝘢𝘨-𝘦𝘴𝘬𝘸𝘦𝘭𝘢,” sumala ni BM Suaybaguio.
Nipaambit sab sa iyang mensahe si Governor Edwin “Kuya Gov” Jubahib nga gibasa ni Board Member Suaybaguio. Siya nagkanayon nga gimugna ang ALSLYMPIC sa iyang administrasyon aron mahatagan og oportunidad ang mga tinun-an sa ALS nga mapakita ang ilang mga tinagoang talento sa natad sa paugnat sa kusog ug sa literary arts. Panahon sab kini nga makahugoy-hugoy sa ubang mga atleta ug makapahuway sa matag adlaw nga hagit sa kinabuhi.
“𝘒𝘶𝘯𝘨 𝘢𝘥𝘶𝘯𝘢𝘺 𝘨𝘪𝘯𝘢𝘵𝘢𝘸𝘢𝘨 𝘯𝘪𝘭𝘢 𝘯𝘨𝘢 𝘴𝘦𝘤𝘰𝘯𝘥 𝘤𝘩𝘢𝘯𝘤𝘦𝘴 𝘴𝘢 𝘬𝘪𝘯𝘢𝘣𝘶𝘩𝘪 𝘢𝘯𝘨 𝘢𝘵𝘰𝘯𝘨 𝘈𝘓𝘚 𝘱𝘳𝘰𝘨𝘳𝘢𝘮 𝘮𝘢𝘰𝘺 𝘮𝘢𝘪𝘯𝘨𝘰𝘯 𝘯𝘢𝘵𝘰 𝘯𝘨𝘢 𝘴𝘦𝘤𝘰𝘯𝘥 𝘤𝘩𝘢𝘯𝘤𝘦 𝘱𝘢𝘳𝘢 𝘴𝘢 𝘬𝘢𝘥𝘵𝘰𝘯𝘨 𝘯𝘢𝘸𝘢𝘥-𝘢𝘯 𝘴𝘢 𝘩𝘪𝘨𝘢𝘺𝘰𝘯 𝘯𝘨𝘢 𝘮𝘢𝘬𝘢𝘵𝘶𝘯𝘨𝘩𝘢, 𝘮𝘢𝘬𝘢𝘨𝘳𝘢𝘥𝘸𝘢𝘳, 𝘶𝘨 𝘮𝘢𝘬𝘢𝘱𝘪𝘭𝘪 𝘴𝘢 𝘪𝘭𝘢𝘯𝘨 𝘨𝘶𝘴𝘵𝘰 𝘯𝘨𝘢 𝘬𝘢𝘳𝘦𝘳𝘢. 𝘜𝘨 𝘬𝘢𝘳𝘰𝘯𝘨 𝘵𝘶𝘯𝘨𝘰𝘳𝘢 𝘪𝘴𝘪𝘱 𝘱𝘢𝘨𝘩𝘢𝘵𝘢𝘨 𝘬𝘢𝘯𝘪𝘯𝘺𝘰 𝘰𝘨 𝘨𝘢𝘮𝘢𝘺 𝘯𝘨𝘢 𝘣𝘳𝘦𝘢𝘬 𝘵𝘪𝘮𝘦 𝘴𝘢 𝘪𝘯𝘺𝘰𝘯𝘨 𝘰𝘳𝘢𝘴 𝘴𝘢 𝘢𝘤𝘢𝘥𝘦𝘮𝘪𝘤𝘴, 𝘢𝘵𝘰𝘯𝘨 𝘨𝘪𝘱𝘢𝘵𝘪𝘨𝘢𝘺𝘰𝘯 𝘬𝘪𝘯𝘪𝘯𝘨 𝘈𝘓𝘚𝘓𝘠𝘔𝘗𝘐𝘊𝘚 𝘢𝘳𝘰𝘯 𝘶𝘴𝘢𝘣 𝘮𝘢𝘬𝘢𝘩𝘪𝘮𝘢𝘮𝘢𝘵 𝘯𝘪𝘯𝘺𝘰 𝘢𝘯𝘨 𝘪𝘯𝘺𝘰𝘯𝘨 𝘮𝘨𝘢 𝘤𝘭𝘢𝘴𝘴𝘮𝘢𝘵𝘦𝘴, 𝘮𝘨𝘢 𝘩𝘪𝘨𝘢𝘭𝘢 𝘶𝘨 𝘢𝘳𝘰𝘯 𝘶𝘴𝘢𝘣 𝘮𝘢𝘥𝘪𝘴𝘬𝘰𝘣𝘳𝘦 𝘯𝘪𝘯𝘺𝘰 𝘢𝘯𝘨 𝘪𝘯𝘺𝘰𝘯𝘨 𝘮𝘨𝘢 𝘩𝘪𝘯𝘪𝘱𝘶𝘴𝘢𝘯𝘨 𝘵𝘢𝘭𝘦𝘯𝘵 𝘴𝘢 𝘴𝘱𝘰𝘳𝘵𝘴 𝘶𝘨 𝘭𝘪𝘵𝘦𝘳𝘢𝘳𝘺 𝘢𝘳𝘵𝘴,” paghatud sa mensahe ni Kuya Gov pinaagi ni BM Suaybaguio.
Nahimong kampeon sa Basketball Men Category ang DavNor Pioneers samtang kampeon sab sa Basketball Women Category ang Panabo Banana Magnates. Naangkon sa Samal Waves ang kampeonato sa Volleyball Men Category ug nakuha sab sa We Are Tagum ang kampeonato sa Volleyball Women Category. Gikoronahan isip Binibining ALSLYMPICS 2023 ang representante gikan sa Panabo Banana Magnates, samtang gikoronahan usab isip Ginoong ALSLYMPICS 2023 ang pambato gikan sa Samal Waves.
Writer: Nestor Mata, Jr.Photo Credits: DavNor Provincial Sports and Youth Development Office
