Gipaduol na pud sa Probinsyal nga Panggamhanan sa Davao del Norte ang daghang mga serbisyo sa Indigenous Peoples (IPs) sa gipahigayon nga ikaduhang yugto sa Oplan Serbisyo sa Kalinaw sa Sitio Tibucag, Barangay Dagohoy, Talaingod.
Gimugna ni Governor Edwin “Kuya Gov” I. Jubahib ang programa aron maghatod og mga serbisyo sa mga IPs, ilabina sa mga pamilya nga apektado sa nahitabong suspensyon sa abaca-buying operations.
Ang mga serbisyo milangkob sa pagpanghatag og libre nga tambal, medical consultation, eye screening, dental extraction, minor surgery sama sa libreng tuli ug uban pa. Apil sa gipangapod-apod ang libre nga food packs para sa 704 ka pamilya, mga tsinelas para sa mga bata, ug mga similya sa klase-klaseng tanom para makatabang sa panginabuhi sa mga residente.
Gitanyag usab ang libreng gupit nga gidalit sa Philippine National Police (PNP) ug Provincial Social Welfare and Development Office (PSWDO), 3500 ka packed lunch gikan sa pondo sa probinsyal bga panggamahanan nga giandam sa Armed Forces of the Philippines (AFP), ug 100 ka tag-lima ka kilo nga bugas gikan sa Tagum Cooperative.
Kapin 450 ang nakabenepisyo sa medical services sa Provincial Health Office (PHO) samtang 55 ang nakapahimulos sa Dental Extraction, 52 sa eye screening, ug 120 sa minor surgery.
Sa mensahe ni Kuya Gov nga gibasa ni Executive Assistant Pastor Emelio Baguio, iyang gipasalamatan ang mga mi-boluntar ug mitabang para mahimong malampuson ang maong programa. Giawhag usab ni Kuya Gov ang mga residente na pahimuslan ang maong higayona aron sila makabenepisyo sa mga serbisyo.
Dako ang pagpasalamat sa mga residente sa Sitio Tibucag sa paghulagway sa maong programa sa ilang lugar. Matod ni Maylyn Manugo nga lumulupyo sa maong lugara ug milinya para makakuha’g tambal para sa iyang anak, dako nga tabang para sa ila ang mga serbisyo nga miduol sa ilang lugar.
“Nanguha mi’g tambal diri kay libre man ang gihatag ni Gov na tambal sa amoa… Pasalamat mi kang Gov Edwin Jubahib… sa iyang pagserbisyo diri sa amoa. Mao nang pasalamat mi sa iyaha kay bisag kalayo diri sa Tibucag, nagsubida sila diri sa paghatag ug mga tambal sa mga bata ug para sa among tanan. Pasalamat mi sa iya kay gihatagan pud mi diri’g similya”, sulti ni Manugo.
Samtang giasoy sa residente nga si Elmo Concian nga nakatabang og pag-ayo ang programa sa pagpakaylap og kalinaw sa ilang panimuyo. Hingpit ang iyang pagpasalamat sa ilang mga naangkon nga benepisyo lakip ang mga similya sa abaca nga ilang nadawat para sa ilang panginabuhi.
“Sa serbisyo, daghan mig nakuha sama sa mga abaca… tambal, medical check-up, among naangkon na benepisyo sa among pagpuyo. Dako kaayog natabang tungod kay ang mga NPA, nangawala na sila na muhatag og kasamok diri sa among pagpuyo. Ang kalinaw amo nang naangkon karon kay naay nagtabang sa amoa na si Kuya Edwin Jubahib. Daghang salamat sa iyang tabang kanamo na kami, magpuyo nga malinawon, ug tanang estudyante maayo na ilang klase… dili na sila magdagan-dagan apil nami maundang ang among panginabuhian, tungod sa abaca naa nami trabaho, ensakto nga pangwarta…”, sulti ni Concian.
Ang Oplan Serbisyo sa Kalinaw usa ka inisyatibo aron mapaabot ang impormasyon bahin sa mga program sa gobyerno ug mahatagan og dinaliang serbisyo ang Geographically Isolated and Disadvantaged Areas (GIDAs), lakip ang mga komunidad nga apektado sa abaca-livelihood crisis.
Writer: Hannah ZafraPhotos: Jonald Lalas
